”對自己好啲”這句說話，其實我到這一刻都唔知點樣理解，我唔覺得我對自己有咩唔好，但我又唔會去問佢點解，諗番轉頭都幾得意，同佢一齊差不多三年，但相處的時間不足半年，除咗因為佢要周圍飛之外，亦因為我自己的問題，唔知點解我覺得兩個人係埋一齊，唔代表要經常見面，每個月見一至兩次己經十分足夠，見到又無咩講，每次都係佢講係外地發生咗咩事，食到啲咩特別的東西，其實這種相處方式唔係人人可以忍受，記得有一次佢同我講咗一啲嘢，佢未講完我已經話：我唔想知，唔想聽！佢好罕有用極重的語氣話：唔好成日講你想唔想，可唔可以顧吓人哋的感受！佢係一個EQ好高的人，所以對佢這兩句說話好有印象，因為佢極少發脾氣........
早前同佢食飯時，佢問咗我一樣嘢：點解當日你忽然間改咗電話?其實你有好多諗法同行為，到這一刻我都無辦法可以理解！
我都唔知點答佢，因為連我自己都唔知自己想點，所以我比咗一個好簡單的答案佢：係嗰個moment我想改咗個電話，唔想聯絡，但連我自己都唔知點解！
我同佢講，所以我現在覺得好自在無壓力，因為同我最親近的，就是一班仔仔女女，牠們除了希望我錫佢哋之外，就沒有其他要求，我做甚麼牠們又不會干預我，佢為我立了一個結論，就係我根本唔識點樣同人相處，佢又同我講：唔單止對自己好啲，亦希望你對身邊的朋友好啲，人大咗，朋友只會愈嚟愈少，學吓珍惜自己身邊的人同事！
今個秋天她便會返澳洲，她說希望在當地的航空公司搵工，因為她很喜歡現在的工作，希望過到去哪邊都可以做番老本行，咁多年來，她無論去到邊都會寄postcard比我，那些postcard上都係一啲問候的說話，簡簡單單，所以每張都不會超過四句說話，以我們相處時間計，其實係某個程度上，她都算很了解我，所以我們做回一對知心的好朋友是一個很明智的選擇．
